აშშ საქართველოსთვის ფინანსური დახმარების გადახედვას არ გამორიცხავს
- ეკონომიკა
- ივნისი 6, 2024
- 105
აშშ საქართველოსთვის ფინანსური დახმარების გადახედვას არ გამორიცხავს. ამის შესახებ სახელმწიფო დეპარტამენტის პრესსპიკერის, მეთიუ მილერის გუშინდელი კომენტარიდან ირკვევა, რომელიც მან ტრადიციული პრესბრიფინგის დროს გააკეთა. მისივე თქმით, ვაშინგტონმა საქართველოსთან კავშირების გადახედვის შესახებ„რუსული კანონის“ მიღების საპასუხოდ დაახლოებით ორი კვირის წინ განაცხადა. როგორც მან აღნიშნა, აქ საუბარია პოლიტიკის სერიოზულ გადახედვაზე და ეს არ არის მხოლოდ რიტორიკა.
“ეს ეხება დახმარების ოდენობას, რომელსაც ჩვენ ვუწევთ საქართველოს. დაახლოებით 390 მილიონი აშშ დოლარი დაიგეგმა ბოლო რამდენიმე წლის განმავლობაში, ეს გადახედვის პროცესშია. საუბარია პოტენციურ სანქციებზე, სავიზო შეზღუდვების პოლიტიკაზე, რომლის შესახებაც ჩვენ ორი კვირის წინ გამოვაცხადეთ და რომელსაც ახლა ვსწავლობთ, როდის და როგორ განვახორციელოთ. ასე რომ, ნახავთ და ჩვენგან მეტს მოისმენთ ამ საკითხზე“, – განაცხადა მეთიუ მილერმა.
ცნობისთვის, აშშ-მა სავიზო სანქციები გამოაცხადა საქართველოში დემოკრატიის უკუსვლაზე პასუხისმგებელთა და მათი ოჯახების წინააღმდეგ.
ამის საპასუხოდ, ირაკლი კობახიძემ განაცხადა, რომ სანქციებითა თუ სავიზო შეზღუდვებით მუქარა აბსოლუტურად კონტრპროდუქტიულია.
